नवी मुंबई। शिवसेना (उद्धव बाळासाहेब ठाकरे)च्या नवी मुंबई संघटनेत मोठा बदल करत प्रवीण म्हात्रे यांची एरोली विधानसभा अध्यक्षपदी नियुक्ती करण्यात आली आहे. शिवसेना पक्षप्रमुख उद्धव ठाकरे यांच्या मार्गदर्शनाखाली ही घोषणा करण्यात आली. प्रवीण म्हात्रे यांच्या संघटन कौशल्य आणि जनसंपर्क कौशल्याच्या आधारे हा निर्णय घेण्यात आला आहे.

प्रवीण म्हात्रे अनेक वर्षांपासून पक्षाच्या संघटनेत सक्रिय असून, त्यांच्या साधेपणामुळे आणि प्रभावी नेतृत्वामुळे पक्षाला नवी मुंबईत नवी दिशा मिळण्याची अपेक्षा आहे. त्यांच्या नियुक्तीमुळे कार्यकर्त्यांमध्ये जबरदस्त उत्साह दिसून येत आहे.

शिवसेनेला मिळणार नवी ऊर्जा आणि बळ
स्थानिक कार्यकर्त्यांनी सांगितले की, प्रवीण म्हात्रे यांच्या नेतृत्वाखाली शिवसेनेची ताकद नवी मुंबईत वाढेल. त्यांचा जनसंपर्क आणि स्थानिक पातळीवरील पकड पक्षासाठी मोठा फायदा ठरेल. आगामी निवडणुकीत हा निर्णय प्रभावी ठरेल, असा विश्वास कार्यकर्त्यांनी व्यक्त केला आहे.नियुक्तीनंतर प्रवीण म्हात्रे म्हणाले, "पक्षाच्या विश्वासाला पात्र ठरण्यासाठी मी प्रामाणिक प्रयत्न करेन. जनतेशी जोडून पक्षाला अधिक बळकट बनवणे ही माझी प्राथमिकता आहे."या निर्णयामुळे नवी मुंबईत शिवसेनेला नवी ऊर्जा मिळाली असून, पक्षाचे स्थान अधिक मजबूत होण्याची अपेक्षा आहे.